Կինոերեկո «Է՜ն ուրիշ Ֆռունզիկը»
Հայաստանի կինեմատոգրաֆիստների միության «Բուխարու սրահում» հավաքվածները երկար ժամանակ չէին շտապում կինոսրահ՝ դիտելու Շուշանիկ Սահակյանի և Հովհաննես Պապիկյանի «Է՜Ն ՈՒՐԻՇ ՖՌՈՒՆԶԻԿԸ» ֆիլմը, որովհետև բոլորն էլ բազմաթիվ հուշեր ու պատմություններ ունեին կապված Մեծ Արտիստի հետ, իսկ ջերմ միջավայրը նպաստում էր, որպեսզի այդ հուշերն ու պատմությունները պատմվեն նորից ու նորից:
Շուշանիկ Սահակյանի և Հովհաննես Պապիկյանի «Է՜Ն ՈՒՐԻՇ ՖՌՈՒՆԶԻԿԸ» ֆիլմի դիտումը կինեմատոգրաֆիստների միության փոքր կինոսրահում մի յուրահատուկ տուրք էր Մեծ Արտիստի հիշատակին, որը կյանքին հրաժեշտ տվեց 1993-ի դեկտեմբերյան ցուրտ օրը՝ թողնելով ահռելի մշակութային ժառանգություն, հիշողություններ ու մարդկային իր տեսակի մասին անվերջանալի հուշեր ու պատմություններ:
Մինչ ֆիլմի դիտումը կինոգետ Ռոբերտ Մաթոսյանը և ռեժիսոր Շուշանիկ Սահակյանը խոսեցին ֆիլմի ստեղծման բարդ ու հետաքրքրական պատմությունից, ֆիլմի անցած ճանապարհից և, իհարկե Մհեր Մկրտչյան Մեծ Արտիստից, որի կյանքն ու ստեղծագործություննէլ հենց ֆիլմի հիմքում է:
Իսկ ֆիլմի դիտումից հետո «Բուխարու սրահում» երկար շարունակվեց խոսքուզրույցը, հուշերի բազմաթիվ դրվագներ ներկայացվեցին, որոնք էլ շատ յուրահատուկ կերպով լրացրեցին պատումը Մեծ Արտիստի մասին:
Երեկոյին ներկա էր նաև անվանի բժիշկ, վիրաբույժ, երջանկահիշատակ Համլետ Թամազյանի դուստրը՝ Լուսինե Բեկիրսկա-Թամազյանը, որը բացառիկ հիշողություններ պատմեց Մհեր Մկրտչյանի կյանքի այն օրերից, որոնք կապված էին նրա կենաց-մահու պայքարի հետ և որտեղ կրկին երևաց Մեծ Արտիստի մարդկային տեսակն ու կերպը:
Այս երեկոն երկար կմնա մասնակիցների հիշողություններում:
Կինեմատոգրաֆիստների միություն FB էջից
«Է՜ն ուրիշ Ֆրունզիկը» ֆիլմի.կինոդիտում
Գայանե ՀՈՎՍԵՓՅԱՆ